ТОЙБОХОЙГО КЫАЙЫЫ КҮНЭ

Улуу Кыайыы 81 сылын кѳрсѳ нэһилиэкпит тэрилтэлэрэ, олохтоохтор биир сомоҕо буолан Улуу Кыайыыны уруйдуур тэрээһиннэргэ кѳхтѳѳхтүк кытыннылар.

Биһиги нэһилиэкпититтэн бастыҥтан бастыҥ -93 эр санаалаах, хорсун-хоодуот уолаттар Ийэ Дойду көҥүлүн уонна тутулуга суох буолуутун туруулаһа, көмүскүү, ытык иэстэрин толоро аттаммыттара. Кинилэртэн 63-с буойун кыргыс хонуутугар көмүс  уҥуохтара хаалбыттара. 20- тэн тахса буойун Кыайыыны уһансан төрөөбүт дойдуларыгар эргиллибиттэрэ.

Сүһүѳхтээх бэйэбит сүгүрүйэн, ахтан-санаан аастыбыт Кыайыы иһин кыргыспыт албан ааттаах буойуннарбытын, күнү – дьылы аахсыбакка күүрээннээх үлэлэринэн өстөөҕү кыайыыга күүс – көмө буолбут, сут – кураан сылларга фронт туһа диэн хоргуйалларын да умнан туран үлэлээбит, кып – кыракый хаалбыт оҕолорун, кыаммат кырдьаҕастарын ииппит, харайбыт тыыннаах хаалларбыт, сэрии тыаһын истибэтэллэр да, холооно суох хорсун быһыыны көрдөрбүт тыыл ветераннарын.

Буойуннар албан ааттарын, гражданскай эр санааланыыны бэлиэтиир норуот бүттүүнүн бырааһынньыгынан — Улуу Кыайыы 81 сылынан эҕэрдэлээтилэр Станислав Васильевич Егоров — олохтоох дьаһалта баһылыга,  Бэтэрээннэр сэбиэттэрин бэрэссэдээтэлэ Мария Саввинова, сэрии сылын оҕолорун аатыттан Клара Тихонова, Анал байыаннай дьайыы кыттыылааҕа Игорь Корнилов, кэлэр кэскиллэрбит, оскуола оҕолорун ааттарыттан эҕэрдэ эттэ  «Движение первых» оҕо түмсүүтүн  лидера Лена Егорова.

Биһиги геройдарбытыгар, кыайыы иһин сэрии толоонугар тыыннарын толук уурбут буойун саллааттарбытыгар ытыктабылларын биллэрэн гирлянда уурдулар Георгий Евдокимович Бессонов аатынан Тойбохой орто оскуолатын «Движение первых» оҕо түмсүүтүн уоланнара.

Бу күн оскуола театральнай коллектива Кыайыы күнүнэн эҕэрдэлээн Николай Якутскай кэпсээнигэр олоҕуран туруорбут “Сайдыы суола” испиктээги кѳрдѳрдүлэр.

Испиктээк кэнниттэн ытык кырдьаҕастарбытын, тыыл бэтэрээннэрин, сэрии тулаайахтарын култуура киинигэр итии чэйдээх сандалы остуолга ыҥыран чэйдэттибит.

Кыайыы умнуллубат! Умнубаттар тулаайах хаалбыт о5олор! Умнубат сир Ийэ дойду! Ким да умнуллубат, туох да умнуллубат! Бу сырдык бырааьынньык биьиги сурэхпитигэр, ойбутугэр –санаабытыгар модун санаа кыайыытын туоһулуур, сэрии, тыыл бэтэрээннэригэр сугуруйэр махтал кунэ.

Биьиги аныгы кѳлүѳнэ, а5а саастаах дьоммут холооно суох  хорсун быьыыларын, хорутуулаах үлэлэрин умнубакка ѳйдүү- саныы  сылдьар, киэн туттар, кѳлүѳнэттэн кѳлүѳнэҕэ тиэрдэр ытык иэспит, кинилэр дьоһуннаах олохторун сал5ыыр ытык эбээьинэспит.