«Оһуохай – саха алгыстаах үҥкүүтэ»

Бүгүн, ыам ыйын 25 күнүгэр нэһилиэкпитигэр Оһуохай күнүн бэлиэтээтибит. Саха барахсан күѳххэ үктэнэн, үѳрэн-кѳтон Оһуохай күнүн бэлиэтиирбит омук быһыытынан уратыбытын кѳрдѳрѳр.

 Ыҥырыылаах ыалдьыппыт Александра Николаевна Константинова тэрээһиммитин Алгыһынан аста. Мустубут дьон Айыыларбыт алгыстаах тыыннарын иҥэриннибит.

Оһуохай күнүнэн истиҥник эҕэрдэлээтэ нэьилиэк бочуоттаах олохтооҕо, Саха сирин оһуохайын Дархан этээччитэ, Саха Өрѳспүүбүлүкэтин фармациятын Бочуоттаах бэтэрээнэ Лилия Дмитриевна Михайлова.

Арассыыйаҕа норуоттар сомоҕолоһууларын, Саха сиригэр култуура, Сунтаар улууһугар номох уонна сайдыы сылларын чэрчитинэн нэһилиэкпит култууратын сайдыытыгар кылааттарын киллэрбит дьоммутун уйэтитэр сыаллаах проект суруйан 2 мѳлүйүѳн 700 тыһыынча солкуобайдаах грант ылбыппытын бар дьоммутугар  үѳрүүбүт үллэстэн кэпсээтибит. Нэһилиэкпит култуурата сайдарыгар үтүѳ холобурдарынан, бэриниилээх үлэлэринэн кылааттарын киллэрбит киэн туттар дьоммут Александр Васильевич Тихонов, хатыламмат куоластаах Анатолий Андреев, кэрэ куоластаах Александра Титова, оһуохайдьыт, хомусчут, сахалыы таҥаһы тиктэн кэтэргэ кѳҕүлээбит Чоросова Анастасия Семеновна – Чооруос Настаа, оһуохайдьыт, тойуксут, алгысчыт Федоров Андрей Николаевич — Араамсык Өндүрэй ааттарын үйэтитии буолар.

Оһуохай күнүгэр оһуохайдьыт, тойуксут, алгысчыт Федоров Андрей Николаевич – Араамсык Өндүрэй туһунан ахтан – санаан улахан кыыһын кэргэнэ Владимир Иванович Данилов кэпсээтэ.

Эҕэрдэлэр этиллибиттэрин кэннэ үрүҥ күн курдук төгүрүктүү тураммыт, илии илииттэн ылсыһан, тарбах тарбахтан даҕайсан, өбүгэбит алгыстаах үҥкүүтүн — оһуокайбытын олохтоотубут. Оһуокайы таһаарарда Дархан этээччи Лилия Дмитриевна, салҕыы улууска киэҥник биллэр Герман Егорович, саҥа этээччи Людмила Мохова, онтон оскуола үѳрэнээччилэрэ Дима Васильев. София Корнилова оһуокай эттилэр. Оҕолору оһуокайга уһуйар РСФСР норуотун үѳрэҕириитин туйгуна, СӨ үѳрэҕириитин бочуоттаах бэтэрээнэ, СӨ норуотун уус-уран айымньытыгар кылаатын иһин бэлиэ хаһаайката, Тойбохой нэьилиэгин Бочуоттаах олохтооҕо Дора Кирилловна Васильева.

Оһуохай күнүгэр анаммыт тэрээһиммитигэр ыҥырыыбытын ылынан кэлбит ыалдьыттарбытыгар, нэһилиэкпит олохтоохторугар махталбытын эттибит. Алгыстаах алаадьыннан күндүлээн, быырпах иһэн тарҕастыбыт

Эллэй эһэбит саҕаттан эппитигэр-хааммытыгар иҥэ сылдьар оһуохайбыт үйэлэргэ сүппэтин !