Ахтан-санаан аастыбыт хатыламмат куоластаах Анатолий Андреевы

Бүгүн, муус устар 16 күнүгэр киэн туттар киһибит, СѲ култууратын туйгуна, хатыламмат куоластаах Анатолий Андреев тѳрѳѳбүтэ 75 сыла. “Кыталык” култуура киинигэр бииргэ үлэлээбит, алтыспыт дьоно, доҕотторо, ырыаларын таптаан истэр нэһилиэкпит олохтоохторо мустан истиҥник санаан, сольнай кэнсиэрин экраҥҥа кѳрѳн, ырыаларын истэн, ыллаан ахтан-санаан аастыбыт.

Ахтыы киэһэтэ Анатолий Андреев сольнай кэнсиэриттэн уһуллубут видеотыттан “Күѳрэгэй” ырыатын ыыллыырын кѳрдѳрүүттэн саҕаланна. Саала иһэ уу чуумпу…  

Клара Степановна Анатолий Андреев туһунан кэпсээн саҕалаата. Анатолийы ыллыырга үөрэппит бастакы учуутала Николай Степанович Иванов эбит. Күндэйэ оскуолатын учуутала. Тойбохойго үөрэнэ кэлбитигэр ырыаһыт уолу Клара, Александр Тихоновтар таба көрөн, эрчийэн, ырыаҕа уһуйбуттар. Клара Степановна Анатолий айылҕаттан бэриллибит ураты, хатыламмат куоластаах ырыаьыт этэ диэн ахтар.

Бу күн бииргэ үлэлээбит, гастролга сылдьыспыт чугас дьонноро Иван Степанович Иванов, Альбина Константиновна Николаева, Александр Васильевич Евсеев, Владимир Иванович Данилов, Розалия Яковлевна Семенова ахтан-санаан кэлбит дьоҥҥо кэпсээтилэр. Уус-Алдантан Анатолий Яковлевичтыын культура коллеһыгар бииргэ үѳрэммит Петухов Василий Николаевич истиҥник санаан ахтыытын аудионнан устан ыыппытын иһиттибит.

Анатолий Андреев ыллаабыт “Күѳрэгэй”, “Лена” ырыаларын Александр Евсеев, Владимир Федоров ыллаан иһитиннэрдилэр.

Анатолий Яковлевич сценаҕа 40 сыл устата ыллаабыт. Ол туоһутунан элбэх Бочуотунай Грамоталар, дипломнар, махтал суруктар, киниэхэ иҥэрилллибит ааттар буолаллар.

Анатолий Андреев — улуус, республика фестивалларын хас да төгүллээх лауреата, «Саха Республикатын культуратын туйгуна». 

Кини үрдүк ситиһиилэрэ: 1970 с. – Иккис Республикатааҕы фольклор фестивалын дипломана; 1974 с. – Политическай уонна комсомольскай ырыа республикатааҕы конкурсун дипломана; 1976 с. – Бүтүн Союзтааҕы фестиваль дипломана; 1978 с. – Москваҕа Бүтүн Союзтааҕы советскай ыччат фестивалын лауреата; 1998 с. – Поэт Леонид Попов 80 сааһын туолуутугар «Тыынннах тыллар ырыалара» конкурска «Грин-при» хаһаайына; 1999 с. – Ыһыахха «Ырыа Дархан» аат иҥэриллибитэ; 1999 с. – «Играй, гармонь» норуот күүлэйигэр «Көмүс куоластаах ырыаһыт»; 2000 с. – «20 үйэ бастыҥ ырыаһыта», «Гран-при» хаһаайына; 2003 с. – Дьокуускайга Сунтаар улууһун баянистарын концерыгар кыттыыны ыла сырыттаҕына, Өксөкүлээх аатынан Киин оччотооҕу директора С. П. Григорьев көҕүлээһининэн, Анатолий Андреевка «Саха Республикатын культуратын туйгуна» аат иҥэриллибитэ; 2004 с. – олунньу 11 күнүгэр Дьокуускайга айар концера ыытыллыбыта, «Ырыа Дуолан» аат иҥэриллибитэ.

Анатолий Андреев ыллаабыт ырыалара: Валерий Ноев — «Кыыс Амма», «Хатыҥчааным барахсан», «Сардааналыын көрсүһүү», «Күөрэгэй»; Леонид Попов тылларыгар — «Хоптолор»; Аркадий Алексеев — «Хайҕыыр хара харахтааҕым», «Тойбохой»; Иван Иванов — «Тоҕой Сэлэ — мин дойдум», «Ферма кыргытттара», «Сүрэҕим эмиэ», «Бу тыллар буолбатах — кубалар», «Сунтаар миигин ыҥырар»; Нуучча норуотун ырыалара — «Родина», «Соловей», «С добрым утром, Родина», «Всю-то я вселенную проехал»; Туприн — «Ийэ мичээрэ» уонна да атыттар.

Бу күн мустубут нэһилиэк олохтоохторо Тойбохойбутун иккис дойду оҥостон, ыал буолан, оҕо-үруу тэнитэн олорбут, хатыламмат куоластаах Анатолий Андреевы истиҥ иһирэх тылынан ахтан, ырыаларын ыллаан кѳрсүһүүнү түмүктээтибит.