«ДАЛБАР» үҥкүү бѳлѳҕѳ 10 сыллаах үбүлүѳйдээх түһүлгэтэ

Тойбохой Далбар хотуттара түмсүбүт «Кыталык» култуура киинин иһинэн үлэлиир Саха Ѳрѳспүүбүлүкэтин култууратын туйгуна Мария Николаевна Семенова салайааччылаах «Далбар» үҥкүү бѳлѳҕѳ 10 сыллаах үбүлүѳйдээх кэнсиэрэ буолан ааста.

«Далбар» үҥкүү бѳлѳҕѳ араас таһымнаах уҥкүү күрэстэригэр кыттан инники күѳҥҥэ сылдьар. Ол курдук, бу сыл кулун тутар ыйга дойдубут тэбэр сүрҕэр — Москуба куоракка бүтүн Россиятааҕы «Танцевальное признание» кѳрүү- күрэскэ I истиэпэннээх лаурет, онтон Казань куоракка ыытыллыбыт Норуоттар икки ардыларынаа5ы «Планета искусств» күрэскэ Гран -при хаһаайыттара буолбуттара.

Бу дьоро киэһэ «Далбар» бѳлѳх айар ситиһиилэрин, Саха Ѳрѳспүүбүлүкэтин, Сунтаар улууһун култууратын сайдыытыгар кылаатын иһин Ил Түмэн Махтал суругун, Сунтаар улууьун култууратын уонна духуобунай сайдыытын салалтатын Хайҕал суругун туттулар.

Кэнсиэркэ «Иэйии», «Ситим» үҥкүү бѳлѳхтѳрѳ, «Дьүѳгэ» ырыаһыттар бѳлѳхтѳрѳ, биирдиилээн ырыаһыттар: Илья Попов, Сардана Егорова, Виктория Ноговицына, Сахаяна Егорова, Григорий Попов, Владимир Федоров, Надежда Сивцева кыттан киэргэттилэр. Нэһилиэкпит олохтоохторо кѳхтѳѳхтүк кэлэн дохсун ытыс тыаһынан доҕуһуоллаан, далбар хотуттар оонньоппут бэлэхтэрин тутан үѳрэн тарҕастылар.

   Кэнсиэр ураты тыыннаах үҥкүү кэрэ эйгэтигэр уйдаран киһи астына көрөр дьоһун түһүлгэтэ буолла.