Тойбохойго «Аан дойду норуоттарын Саҥа Дьыллааҕы карнавала» шоу — концерт

Ахсынньы 31 күнүгэр ааьан эрэр 2025 сылы бииргэ атаараары, эҕэрдэ, махтал тылларын нэһилиэкпит олохтоохторугар, ыалдьыттарыгар этээри киэркэйбит кулууппутугар муһуннубут.

Кэлэр 2026 сыл кыһыл ат сыла-ол эбэтэр, бу сыл түргэн тэтимнээх сэниэ агалыахтаах, көҥүлү, элбэх үөрүүнү, ситиһиилээх сылы эрэннэрэр.

Арассыыйаҕа 2026 сыл Арассыыйа норуоттарын сомоҕолоһуутун сылынан биллэрилиннэ, Сахабыт сиригэр култуура сыла. Онтон сиэттэрэн кэлэр сылбытыгар түмсэммит биир сомоҕо  буолуоххайын диэн ыҥыран нэһилиэкпит тэрилтэлэригэр күрэс биллэрэн «Аан дойду норуоттарын Саҥа Дьыллааҕы карнавала» диэн ааттаах шоу – концерт тэрилиннэ.

“Үтүө киэһэннэн бар дьоммут, Дьэ күүтүүлээх саҥа дьылбыт тигинээн кэлэрэ номнуо агыйах чаас хаалла, ол курдук ааһан эрэр 2025 сылбытыгар махтаныаххайын уонна бу күнү бары бииргэ үөрүүлээхтик атаарыаххайын!” – кэнсиэр ытыс тыаһынан са5аланна.

Күрэскэ итии Африка норуоттара — С.Г.  Кривошапкин аатынан о5ону дьиэ кэргэҥҥэ иитиигэ кѳмѳнү оҥорор киин кэллэктиибэ, куннээх Армения норуоттара -Тойбохойдооҕу врачебнай амбулатория кэллэктиибэ, клевер символлаах күѳх Ираландия норуоттара — Г.Е. Бессонов аатынан Тойбохой орто оскуолатын кэллэктиибэ норуоттарын ураты култуураларын, ырыаларын, үҥкүүлэрин театрализованнай дьүһүйүү гынан кѳрдѳрдүлэр.

Итии Африка норуоттара уоттаах- күѳстээх үҥкүүлэрин, саҥа сылы кѳрсѳр сиэрдэрин-туомнарын кѳрдѳрдулэр, норуоттарын тылынан э5эрдэлээтилэр.

Куннээх Армения норуоттарын имигэс үҥкүүтүн биир тэҥник хамсанан,  тэтимнээх ырыаларынан дойдуларын билиһиннэрдилэр.

Клевер символлаах күѳх Ираландия норуоттарын култууратын, үҥкүүлэрин биир толору театрализованнай дьүһүйуу оҥорон кѳрдѳрдүлэр.

Кыттыбыт тэрилтэлэрбит киһи кѳрѳн астыныах таҥастара, ырыалара, үҥкүүлэрэ дьиҥнээх карнавал, Саҥа дьыл аптаах тыынын бэлэхтээтилэр.

Дьүүллүүр сүбэ быһаарыытынан тумук:

1 миэстэ — Г.Е. Бессонов аатынан Тойбохой орто оскуолатын кэллэктиибэ – күѳх

Ирландия норуоттара;

2 миэстэ — Семен Гаврильевич Кривошапкин аатынан О5ону дьиэ кэргэҥҥэ

иитиигэ кѳмѳнү оҥорор киин кэллэктиибэ –итии дойду Африка норуоттара;

3 миэстэ — Тойбохойдооҕу врачебнай амбулатория кэллэктиибэ- Күннээх Армения норуоттара буоллулар.

Бу дьоро киэһэни “Далбар” үҥкүү, “Дуораан” ырыа бѳлѳҕѳ, Анастасия Березкина, Станислав Николаев,Иван Иванов, Татьяна Николаева, Анюта Васильева киэргэттилэр.

Саҥа Дьыл үүнүөхтээх түүнүгэр

Саҥа Дьол аргыһа буолаҥҥын

Сандаара үллүктээ, үрүҥ хаар,

Сир ийэ киэлитин сырдатан!

Дьиримнии тырымныыр сулустар,

Дьол-соргу сирдьитэ буолаҥҥыт

Хас биирдии сүрэххэ бэлэхтээҥ

Хардалаах үйэлээх тапталы!

Саҥа Дьыл күүтүүлээх түгэнэ

Хас сүрэх аайытын нүөлүйдүн!

Алыптаах бу нуурал киэһэҕэ 

Барыбыт ырабыт туолуохтун!

Саҥа Дьылынан! Саҥа Дьолунан!